Evanjely 6 Desambra 2018
Bokin'i Isaia 26,1-6.
Amin'izany andro izany dia hohiraina eto amin'ny tanin'ny Joda ity hira ity: Manana tanàna mafy isika; nanamboatra manda sy rindrina hamonjy antsika Izy.
Vohay ny varavarana: avelao hiditra ireo olo-marina mitana ny tsy fivadihana.
Tafatoetra ny fanahiny; homenao fiadanam-po sy fiadanana izy satria matoky anao izy.
Matokia ny Tompo mandrakariva satria vatolampy mandrakizay ny Tompo;
satria novonoiny ny mponina any ambony; ny tanàna avo dia noravany, naongorany hatramin'ny tany, noravany hatramin'ny tany.
Ny tongotra no manitsaka azy, ny tongotry ny ampahorina, ny dian'ny mahantra ».
Salmi 118(117),1.8-9.19-21.25-27a.
Mankalazà an'i Jehovah, fa tsara Izy;
Fa mandrakizay ny famindram-pony.
Aleo mialoka amin'i Jehovah toy izay matoky olona.
Aleo mialoka amin'i Jehovah Toy izay matoky ny mahery.
Vohay ny varavaran'ny fahamarinana aho:
Te hiditra sy hisaotra ny Tompo aho.
Ity no varavaran'ny Tompo,
amin'ny alalany no hidiran'ny marina.
Misaotra anao aho, satria efa nihaino ahy ianao,
satria famonjena ahy ianao.
Omeo, famonjenao, Tompo ô, omeo ny fandresena, Tompoko!
Sambatra izay avy amin'ny anaran'i Jehovah.
Mitsodrano anao avy amin'ny tranon'ny Tompo izahay;
Andriamanitra, ny Tompo no fanazavana anay.
Avy amin'ny Filazantsaran'i Jesosy Kristy araka ny Matio 7,21.24-27.
Tamin'izany fotoana izany dia hoy Jesosy tamin'ny mpianany: «Tsy izay manao amiko hoe: Tompoko, Tompoko, no hiditra amin'ny fanjakan'ny lanitra, fa izay manao ny sitrapon'ny Raiko Izay any an-danitra.
Koa na iza na iza mandre izany teniko izany ka mampihatra azy, dia hoatra ny lehilahy hendry izay nanorina ny tranony teo ambonin'ny vatolampy.
Nilatsaka ny orana, ony ny riaka, nifofofofo ny rivotra ka namely izany trano izany, nefa tsy nianjera izy, satria niorina teo ambonin'ny vatolampy.
Izay mandre izany teniko izany ka tsy mampihatra azy dia toy ny lehilahy adala izay nanorina ny tranony tamin'ny fasika.
Nilatsaka ny orana, nandriaka ny riaka, nifofofofo ny rivotra ka namely izany trano izany, dia nianjera izy, ary be ny fandravana. "